ابحكي شعورٍ من صميم العنـا مسـرود
لاجل تاضح الصورة لمن يجهل الصـورة
تحت رحمة الله صابرٍ / والصبر محمـود
أجاهد زمـانٍ تجـذب آيامـه اشهـوره
زماني رماني وابذل ابعمـري المجهـود
حسب قدرتي .. والوقت ماينومن جـوره
تعبت وغدا قلب العنـا فالليـال السـود
ودارتبي الدنيا .. وهي تحسـن الـدورة
جروح الزمن تبقى .. وعمر الفتى محدود
وساقٍ كسرها الوقت ماهيب مجبـورة !!
أنا لي ثلاث اشهور : (متوتـرٍ مشـدود)
وهمّي حنا حالـي كمـا حنـي باكـورة
وحظي ليا من قام طاح ورثع مقـرود !!
وانـا مومـنٍ بالله وحكمـه ومـقـدوره
مدام الرضا موجود حبل الأمـل ممـدود
مع الضيق مخرج // بعده الحال ميسورة
وانا قانع وزاهد وباب السخـط مسـدود
عسى قلبي المهمـوم ينبّـث بـه نـوره
كثير المصاعب والتجارب وراهـا فـود
وكثـر التمعـن فيـه الآيـات منثـورة
تعلّمت من ميلة زمانـي وفـااا وعهـود
واخذت العبـر بزيـارة العـود وقبـوره
مصير الجسد بالموت : دار اللحد والدود
ومن بعدها الافـواج للحشـر منشـورة
نهارٍ تفوز اوجيه ..وآخرى تبـدّل سـود
نهار الحساب وكـل الافـواج محشـورة
ألا ياإلاهـي طالبـك عفـوك المشهـود
وتغفر ذنوبي يـوم الاعمـال محصـورة
وتجعل مصيري مع هل الخير واهل الجود
مع اوجيهٍ ابعفـوك تبسّـم و مسـرورة
